Na-promote at tumaas ang ranggo ng 4,125 guro at iba pang education personnel sa Cagayan Valley matapos manumpa nitong Biyernes sa mass oath-taking ceremony na pinangunahan ni President Ferdinand Marcos Jr.
Idinaos ang seremonya sa Santiago City Sports Arena sa Barangay Baluarte bilang bahagi ng Expanded Career Progression (ECP) System ng Department of Education.
“Kaya nangako ako sa ating mga guro: hindi na tayo papayag na mayroong guro na magre-retire bilang Teacher I,” sabi ni Marcos.
Ayon sa Pangulo, sa dating sistema, umaabot sa 10 hanggang 20 taon bago makaangat ang isang Teacher I sa Teacher III. Posible ring ganoon katagal mula Teacher III patungong Master Teacher I.
“Hindi tama na ibinibigay ninyo ang napakalaking bahagi ng inyong buhay sa pagtuturo, tapos hindi kayo umuunlad sa inyong propesyon,” aniya.
Sa ilalim ng ECP System, pinalawak ang career advancement opportunities para sa teachers at school heads.
Hanggang September, 82,105 teachers at school heads na sa buong bansa ang na-promote sa ilalim ng career progression initiatives ng administrasyon.
Pinangunahan ni Education Secretary Juan Edgardo “Sonny” Angara Jr. ang mass oath-taking. Dumalo rin sina House Speaker Faustino “Bojie” Dy at Santiago City Mayor Alyssa Sheena Tan.
Kasabay ng National Teachers’ Month, nagpasalamat si Marcos sa mga guro at school principals sa kanilang serbisyo at sakripisyo sa edukasyon. /Bistado