Hindi mo ‘yun guni-guni. Mabagal talaga ang internet sa mga nakaraang araw dito sa Metro Manila.
Dahil diyan, tig-P100,000 kada araw ang multang ipinataw ng National Telecommunications Commission (NTC) sa DITO Telecommunity, Globe Telecom at Smart Communications dahil sa mahinang mobile broadband service sa ilang bahagi ng Metro Manila.
Nagsimula ang penalty noong September 25 at magpapatuloy hanggang maitama ng bawat telco ang service deficiencies na tinukoy ng regulator.
Nagkasa ang NTC ng show-cause orders matapos walang makitang measurable improvement sa September 2026 mobile speed test revalidation kumpara sa validation activities noong una at ikalawang quarter.
“The September results confirmed that previously recorded poor mobile broadband signals remain substantially unchanged, despite the opportunity afforded mobile network operators to undertake urgent corrective measures,” ayon sa NTC.
Sa Globe, tinukoy ang Manila, Makati at Quezon City bilang problem areas. San Juan, Pasay at Las Piñas naman sa DITO, habang Parañaque, Manila at Pasig sa Smart.
“The NTC has prepared Show Cause Orders against the three mobile network operators imposing a daily penalty of P100,000.00 per day commencing today until the identified service deficiencies have been fully rectified,” ayon sa ahensya.
Magsasagawa ang NTC ng retesting kada dalawang linggo sa mga tinukoy na lugar para malaman kung umayos na ang serbisyo. Patuloy din ang monitoring sa ibang bahagi ng Metro Manila.
Mananatili ang P100,000 daily penalty sa bawat telco hanggang maitama ang mga kakulangan sa serbisyong tinukoy ng NTC. /Bistado