Posibleng lumakas at maging typhoon ang Tropical Storm Queenie sa Linggo, September 27, ayon sa Philippine Atmospheric, Geophysical and Astronomical Services Administration (Pagasa). Pagtataya pa lamang ito at maaari pang magbago ang lakas at direksiyon ng bagyo.
Sa 11 a.m. bulletin nitong Huwebes, September 24, nasa 1,310 kilometro silangan ng Northern Luzon ang sentro ng Queenie. Kumikilos ito pakanlurang hilagang-kanluran sa bilis na 35 kilometro kada oras, taglay ang hanging 75 kilometro kada oras malapit sa gitna at pagbugsong hanggang 90 kilometro kada oras. Wala pang nakataas na tropical cyclone wind signal nang ilabas ang bulletin.
Gayunman, maaaring magdala ng malalakas na pagbugso ng hangin ang gilid at trough ng Queenie sa Batanes, Babuyan Islands at Ilocos Norte ngayong Huwebes. Inaasahan din ang ganitong pagbugso sa Davao Oriental, Davao Occidental at Sarangani mula Biyernes hanggang Sabado.
Tinatayang kikilos ang Queenie pakanlurang hilagang-kanluran hanggang Biyernes, saka liliko pahilagang hilagang-silangan pagsapit ng Lunes. Maaari itong lumabas ng Philippine area of responsibility sa umaga ng Martes, September 29.
Pinaalala ng Pagasa na maaari pang magbago ang tinatahak nito, kaya dapat subaybayan ang mga susunod na bulletin. /Bistado