ILOILO CITY – Tatlong indibidwal na umano’y bahagi ng mobile criminal group na konektado sa burglary-related activities na tinatawag na “Termite Gang” ang naaresto sa anti-drug operation sa Iloilo City noong June 16, 2026.
Ayon sa Philippine National Police, bahagi ang operasyon ng tuloy-tuloy at intelligence-driven campaign nito laban sa ilegal na droga at organized criminal networks.
Isinagawa ng operatives ng Special Operations Unit 6 ng Philippine National Police Drug Enforcement Group, sa koordinasyon ng Iloilo City Police Station 10 at Integrity Monitoring and Enforcement Group Visayas, ang buy-bust operation sa Barangay Bolilao, Mandurriao District.
Nasamsam sa operasyon ang mahigit isang kilo, o humigit-kumulang 1,020 grams, ng hinihinalang shabu na may estimated Standard Drug Price na P6,936,000.
Kinilala ang mga naaresto sa kanilang aliases na “JR,” “RJ,” at “Alog,” na kilala rin bilang “Foreman.”
Batay sa initial validation ng mga awtoridad, dalawa sa mga suspek ay magkapatid. Patuloy ding bineberipika ang umano’y koneksyon nila sa drug distribution activities na posibleng umaabot hanggang Metro Manila.
Ayon sa ulat, ilang linggo ring isinailalim sa surveillance ang mga suspek batay sa pinagsama-samang impormasyon mula sa concerned citizens at intelligence monitoring efforts.
Ang “Termite Gang” ay iniuugnay sa burglary-related activities at naiulat nang kumikilos sa ilang bahagi ng bansa.
Na-turn over na ang lahat ng nakuhang ebidensiya sa Regional Forensic Unit 6 para sa laboratory examination.
Inihahanda na ang kaukulang kaso laban sa mga suspek para sa paglabag sa Republic Act No. 9165, o Comprehensive Dangerous Drugs Act of 2002. /Bistado