LEGAZPI CITY — Mas matatag at malinis na suplay ng kuryente ang target na maihatid sa Camarines Sur matapos pasiglahin nitong Miyerkoles ang 3-megawatt-peak (MWp) solar power project sa Tigaon.
Pinangunahan ng Department of Energy (DOE) at Trademaster Renewable One Inc. ang energization ng solar facility para sa Camarines Sur IV Electric Cooperative (Casureco IV).
Nakatayo ang ground-mounted solar facility sa 2.42 ektaryang lupain. Inaasahang makagagawa ito ng sapat na malinis na kuryente para sa tinatayang 1,900 kabahayan bawat taon.
Makatutulong din ang proyekto sa paghahatid ng mas maaasahang kuryente sa mga bahay, paaralan, health centers, government facilities at local businesses sa franchise area ng electric cooperative.
Ayon kay Energy Secretary Sharon Garin, nagpapakita ang proyekto ng mahalagang papel ng renewable energy investments sa pagpapatatag ng local power systems at pagbibigay ng direktang pakinabang sa consumers at host communities.
“The CASURECO IV Solar Power Project demonstrates how renewable energy investments can strengthen local power reliability while ensuring that host communities directly benefit from the responsible development of their resources. As we continue to expand the country’s clean energy portfolio, we remain committed to projects that enhance energy security, support sustainable development, and provide Filipino consumers with cleaner, more reliable, and more resilient electricity,” ani Garin.
Bahagi ang proyekto ng programa ng pamahalaan para palawakin ang renewable energy deployment at maghatid ng mas maaasahan, abot-kaya at sustainable na kuryente sa mga komunidad.
Target din nitong lumikha ng trabaho sa pamamagitan ng pagbibigay-prayoridad sa local hiring at pagbili ng mga kailangang produkto at serbisyo mula sa host communities.
Ayon sa DOE, ang pagpapalawak ng indigenous at sustainable energy sources ay makababawas sa pagdepende ng bansa sa imported fuel. Mapalalakas din nito ang katatagan ng local power systems laban sa problema sa pandaigdigang suplay at presyo ng enerhiya.
Suportado ng proyekto ang national targets na maitaas sa 35 porsiyento ang bahagi ng renewable energy sa power generation mix pagsapit ng 2030 at 50 porsiyento sa 2040. /Bistado