Nasabat ng Bureau of Customs (BOC)–Port of Clark ang 925 gramo ng hinihinalang shabu na nagkakahalaga ng ₱6.29 milyon at nakatago umano sa shipment na idineklarang water pressure equipment.
Sa ulat nitong Martes, sinabi ng BOC na mula sa United States ang kargamento at ipadadala sana sa Taytay, Rizal.
Habang isinasagawa ang Customs clearance procedures, nakakita ng kahina-hinalang images ang X-ray Inspection Project sa loob ng idineklarang water pressure equipment. Dahil dito, isinailalim ang shipment sa masusing inspeksyon.
Nagpositibo rin sa posibleng presensya ng dangerous drugs ang isinagawang K-9 sweep ng Philippine Drug Enforcement Agency (PDEA).
Sa 100-percent physical examination, nadiskubre ng mga awtoridad ang isang transparent plastic bag na binalot ng duct tape. Naglalaman ito ng 925 gramo ng hinihinalang shabu.
Binigyang-diin ni Customs Commissioner Ariel Nepomuceno ang kahalagahan ng pagsasama ng modernong inspection technology at kakayahan ng mga tauhan ng Customs sa pagbabantay sa mga pumapasok na shipment.
“Our X-ray machines are a huge help, but the knowledge, skills and vigilance of our Customs officers are equally important. We continue to strengthen their capabilities so they can detect suspicious shipments faster and more effectively,” ani Nepomuceno.
Naglabas ang BOC ng warrant of seizure and detention laban sa shipment dahil sa paglabag sa Section 1113(l)(3), (4) at (5) ng Republic Act No. 10863, o Customs Modernization and Tariff Act.
Iniugnay rin ang kaso sa Republic Act No. 9165, o Comprehensive Dangerous Drugs Act of 2002, as amended. /Bistado