Maaaring isa sa pinakamahalagang araw ng impeachment trial ni Vice President Sara Duterte para sa mga senator-judge ang pagharap ng apat na retiradong Supreme Court justices upang himayin ang kontrobersyal na 16-vote threshold para sa conviction.
Nakatakdang marinig ng Senate impeachment court ngayong Miyerkules, September 16, ang pananaw nina retired Chief Justices Hilario Davide Jr., Artemio Panganiban at Reynato Puno, at retired Associate Justice Adolfo Azcuna.
“Tomorrow could be the biggest day of the impeachment trial for the senator-judges,” ani Senator-Judge Panfilo “Ping” Lacson sa X nitong Martes.
Sina Davide at Azcuna ay naging miyembro rin ng 1986 Constitutional Commission na bumalangkas sa 1987 Constitution.
“We will hear from three ex-Supreme Court CJs and one former associate justice. Two were also members of the 1986 Constitutional Commission who helped craft the 1987 Constitution,” sabi ni Lacson.
Inimbitahan ang apat bilang “amici curiae” o friends of the court habang pinagpapasyahan ng impeachment court ang motion for reconsideration ni Senator-Judge Erwin Tulfo sa 16-vote threshold para ma-convict ang Bise Presidente.
Sa ilalim ng Constitution, kailangan ang concurrence ng two-thirds ng lahat ng miyembro ng Senado upang ma-convict ang isang impeached official.
Sentro ngayon ng debate kung dapat bang ibatay ang two-thirds requirement sa lahat ng 24 senador o lamang sa mga senator-judge na maaaring aktuwal na lumahok sa proceedings.
Nauna nang sinabi ni Lacson na dapat pakinggan ng mga senator-judge ang mga retiradong mahistrado “word for word” dahil nahaharap ang impeachment court sa novel situation kung saan may mga miyembrong maaaring nakakulong, nasa ibang bansa o nagtatago.
“Ibig sabihin ang 15 senator-judges, magpapatuloy pa rin ba sa pagdinig ng impeachment trial ng impeachable official kung alam ng lahat na moot and academic kasi hindi aabot sa 16 ang numero?” ani Lacson.
Inaasahang magiging mahalagang gabay ang pananaw ng apat na dating mahistrado sa pagresolba ng impeachment court kung mananatili ang 16 boto bilang kinakailangan para sa conviction. /Bistado