May personal na pakinabang si Vice President Sara Duterte sa sarili niyang panawagan na magbitiw sa puwesto si Pangulong Ferdinand Marcos Jr., kaya dapat ding tingnan kung sino ang nagsasabi ng mensahe, ayon kay House prosecution spokesperson at Lanao del Sur Rep. Zia Alonto Adiong.
Sa House prosecution press conference nitong Biyernes, September 11, inilarawan ni Adiong bilang conflict of interest ang sitwasyon dahil ang Bise Presidente ang hahalili sa Pangulo sakaling mabakante ang presidency dahil sa resignation.
“Una, importante po, hindi lang ang message kundi sino ang nagsasabi ng message na ito,” ani Adiong.
Ginawa ni Duterte ang panawagan matapos siyang humarap sa Quezon City Regional Trial Court kaugnay ng grave-threats case laban sa kanya.
Ipinagpaliban ng korte ang kanyang arraignment matapos ang kahilingan ng kanyang kampo. Inatasan muna ang Department of Justice (DOJ) na magkomento sa mosyon ng depensa bago ito resolbahin.
Tumanggi naman ang abogado ni Duterte na si Paul Lawrence Lim na ihayag ang nilalaman ng mosyon.
Sa kanyang mensahe sa mga supporter pagkatapos ng pagdinig, nanawagan si Duterte kay Marcos na magbitiw at inakusahan ang Pangulo ng dishonesty at abuse.
Sinabi rin ng Bise Presidente na hindi siya maaaring manahimik habang nahaharap ang mga Pilipino sa pagbaha at problema sa pagtataguyod ng kanilang pamilya. Hinikayat niya ang kanyang mga supporter na patuloy na tutulan ang inilalarawan niyang pang-aabuso at korapsyon.
Sa pagtukoy sa constitutional succession kung mababakante ang presidency, nagtanong si Adiong: “Who stands to benefit?”
Samantala, kinilala ni former Rep. Ace Barbers, adviser at spokesperson ng House prosecution team, ang karapatan ni Duterte na magpahayag ng kanyang pananaw laban sa Pangulo.
“Well, karapatan naman niya magsalita o magbigay ng statement kung anong kanyang opinion at nararamdaman against anyone and against the situation she’s facing,” ani Barbers.
Binigyang-diin din niya na ang kasalukuyang court proceedings ay nagbibigay kay Duterte ng pagkakataong gamitin ang kanyang mga karapatan.
“Itong nangyayari ngayon ay patunay na may binibigay na due process para sa kanya,” sabi niya.
“She can say whatever she wants to say,” dagdag ni Barbers. /Bistado