Mga retiradong mahistrado ng Supreme Court at iba pang legal experts ang kukunin ng Senate impeachment court bilang “amici curiae” o “friends of the court” upang tumulong sa pagresolba kung ilang boto ang kailangan para ma-convict o ma-acquit si Vice President Sara Duterte.
Nakatakdang dinggin ang amici curiae sa Miyerkules, September 16, kasunod ng mosyon ni Senator-Judge Erwin Tulfo na muling pag-aralan ang naunang ruling ni Presiding Officer Francis “Chiz” Escudero na 16 boto ang kailangan para sa conviction.
Nakasaad sa 1987 Constitution na hindi maaaring ma-convict ang isang impeached official nang walang concurrence ng two-thirds ng lahat ng miyembro ng Senado. Ang pinagdedebatehan ngayon ay kung ang basehan ay lahat ng 24 senador o ang mga legal na makakalahok sa impeachment proceedings at final vote.
Apat na senador ang kasalukuyang hindi nakakadalo sa trial: sina Jinggoy Estrada at Rodante Marcoleta na nakadetine kaugnay ng plunder charges, Ronald “Bato” dela Rosa na nahaharap sa arrest warrant ng International Criminal Court, at Loren Legarda na nasa abroad sa extended medical leave.
Ayon kay Escudero, makatutulong ang mga iimbitahang legal experts sa paghimay sa constitutional issue bago magpasya ang impeachment court.
“I hope that, through their extensive knowledge of the Constitution, as well as their experience in legal matters, they can provide us with their insights on this issue, whether in favor of or against either side,” ani Escudero.
Sinabi naman ni Senator-Judge Francis “Kiko” Pangilinan na maaaring kabilang sa amici curiae ang eminent legal experts, retired chief justices, retired Supreme Court justices at constitutional law experts.
Magkakaiba na rin ang pananaw ng ilang retiradong mahistrado.
Para kay retired Supreme Court Associate Justice Adolfo Azcuna, dapat manatili sa 16 ang kinakailangang boto dahil miyembro pa rin ng Senado ang mga hindi nakakadalo.
“My view is that the voting threshold is based on the number of members of the Senate whether or not those members are present or able to actively participate,” ani Azcuna.
Kabaligtaran naman ang pananaw ni retired Supreme Court Senior Associate Justice Antonio Carpio, na nagsabing dapat ibatay ang two-thirds computation sa mga senador na legally qualified na lumahok.
“If you cannot hold office, you cannot vote,” ani Carpio.
Sa September 23, bibigyan ang prosecution at defense ng tig-15 minuto para ilatag ang kanilang posisyon sa oral arguments. Pagkatapos nito, inaasahang boboto ang Senate impeachment court kung pananatilihin ang 24-member voting base at 16-vote threshold o gagamit ng ibang computation. /Bistado