Sinimulan ng PLDT ang kampanya nito para mapanatili ang titulo sa pamamagitan ng 25-23, 25-15, 26-28, 25-14 na tagumpay laban sa EST Cola ng Thailand sa Premier Volleyball League (PVL) Invitational nitong Lunes.
Nagtala ang reigning PVL Most Valuable Player na si Savi Davison ng 30 puntos mula sa 24 attacks, limang blocks at isang ace para sa High Speed Hitters, na nangibabaw sa fourth set upang selyuhan ang panalo sa loob ng isang oras at 47 minuto sa Smart Araneta Coliseum sa Quezon City.
Nagdagdag si Mika Reyes ng 13 puntos mula sa 10 attacks at anim na blocks, habang may siyam na puntos si Jovelyn Grace Prado, kasama ang 21 digs at 13 receptions.
Nag-ambag naman sina Kim Kiana Dy at Mary Joy Baron ng tig-walong puntos at pitong puntos, ayon sa pagkakasunod.
Nalampasan ng PLDT ang Thai squad sa attacks (60-42) at blocks (14-11), habang nagtala ang setter na si Kim Fajardo ng 29 excellent sets, mas marami ng walo sa katapat na si Natnicha Saelao.
Nakagawa rin ang High Speed Hitters ng anim na service aces habang dalawa lamang ang kanilang pinalusot. Lalo silang nakinabang sa 25 puntos mula sa errors ng kalaban kumpara sa 21 puntos na kanilang ipinagkaloob.
Pinangunahan ni Nirarach Srikuta ang EST Cola na may 14 puntos mula sa 10 attacks at apat na aces. Nagdagdag naman si Nannaphat Moonjakham ng 12 puntos, kabilang ang 10 attacks.
May walong puntos ang team captain na si Hantima Aekpatcha, habang sina Supawadee Panwilai at Papatchaya Phontham ay parehong nagtala ng tig-anim na puntos.
Sa iba pang laro, nanaig ang Creamline kontra Nxled, 25-20, 25-23, 23-25, 25-20; at ang Farm Fresh laban sa Ho Chi Minh of Vietnam, 25-14, 25-15, 26-28, 25-20.
Nanguna sina Tots Carlos, Jema Galanza at Alyssa Valdez para sa Cool Smashers sa huling bahagi ng laban na nagpabagsak sa Chameleons.
Ang magkakasunod na atake ni Galanza ay nagbigay sa Creamline ng 20-17 na kalamangan, bago lalo pang idiniin ni Carlos ang kanilang opensiba sa pamamagitan ng tatlong sunod na puntos na nagpapanatili ng tatlong puntos na lamang, 23-20.
Umiskor si Valdez sa ikalawang pagtatangka, na piniling gumamit ng off-speed shot matapos mahukay ng depensa ang una niyang malakas na tira. Sa sumunod na mahabang palitan, tuluyan nang bumigay ang Nxled.
“I just reminded my teammates to stay relaxed and finish the game properly,” ani Louie Romero ng Farm Fresh, na nagbigay ng 24 excellent sets upang masungkit ang Best Player of the Game honors.
Ngayong Martes, makakaharap ng PLDT ang Nxled simula 1:30 p.m. habang susubukan ng EST Cola na makabawi laban sa Farm Fresh sa ganap a 4 p.m.