Sisimulan ng PLDT ang pagtatanggol sa titulo laban sa EST Cola ng Thailand sa Premier Volleyball League (PVL) Invitational ngayong Lunes sa Smart Araneta Coliseum sa Quezon City.
Pinangungunahan ni Filipino-Canadian Savi Davison, haharap ang High Speed Hitters sa mga Thai spikers simula 1:30 p.m.
Inaasahan ding mag-aambag para sa PLDT sina Kim Dy, Alleiah Malaluan, Majoy Baron at Mika Reyes.
Sa 2025 finals, tinalo ng PLDT ang Kobe Shinwa University ng Japan, 21-25, 31-29, 25-22, 25-18.
Haharapin naman ng 2023-2024 champion Creamline ang Nxled simula 4 p.m., habang makakasagupa ng Farm Fresh ang Ho Chi Minh Volleyball Club ng Vietnam 6:30 p.m.
Anim na playdate ang isasagawa sa loob lamang ng walong araw.
“It feels like we’ve already experienced this, back in the first PVL season where the games were played consecutively. So, I suppose what really matters is how we manage to recover — from the first game to the second, and the ones that follow,” ani middle blocker ng Creamline na si Sachi Minowa (Jaja Santiago).
Pangungunahan ang Cool Smashers nina Alyssa Valdez, Jema Galanza, Tots Carlos, Michelle Gumabao, Pangs Panaga at Bea de Leon.
Aasa naman ang Nxled Chameleons kina Brooke Van Sickle, Myla Pablo, MJ Phillips, Jonah Escamilla, Chiara Permentilla, Jovelyn Fernandez, EJ Cariño at Leyann de Guzman, kasama ang suporta ng mga bagong recruit na sina Gel Cayuna at Jackie Acuña.
Sina team captain Ces Molina at beteranang si Ara Galang ang magdadala sa Farm Fresh Foxies laban sa koponan ng Vietnam.
Itatampok sa Martes ang PLDT kontra Nxled 1:30 p.m.; Farm Fresh kontra EST Cola 4 p.m.; at Creamline kontra Ho Chi Minh 6:30 p.m.
Magpapahinga ang torneo sa Miyerkules bago muling sumabak ng magkakasunod na playdate.
Magtatapos ang elimination round sa mga laban sa Setyembre 6, pagkatapos nito ay uusad ang dalawang nangungunang koponan sa championship match sa Setyembre 8. Tampok din sa araw na iyon ang laban para sa ikatlong puwesto at ang consolation match para sa ikalimang puwesto.