Tulad ng inaasahan, gumawa si Kai Sotto ng pinakamalaking defensive play ng gabi upang itakas ang Pilipinas laban sa Jordan, 82-81, sa overtime sa FIBA Basketball World Cup 2027 Asian Qualifiers na dinagsa sa Mall of Asia Arena sa Pasay City nitong Byernes kahit masama ang panahon.
Winakasan ng Pilipinas ang four-game losing streak at umakyat sa 3-4 ngunit nananatili pa rin sa labas ng top three. Tabla naman ang Jordan sa Iran at New Zealand sa 5-2.
Tinalo ng New Zealand ang Iran sa overtime din, 93-91, sa naunang laro.
Maghaharap ang Pilipinas at Iran sa Linggo simula 8 p.m.
Sa pagbabalik sa koponan makalipas ang halos dalawang taon, nasa tamang lugar at tamang oras ang 7-foot-3 nang kanyang harangan ang pagtatangkang layup Abdullah Olajuwon ilang sandali bago matapos ang oras.
Napanatili rin ng malaking defensive play na iyon ang naging kontribusyon ni Sotto, matapos siyang magtala ng 18 puntos at 14 rebounds, bukod pa sa dalawang blocked shots, habang tumulong siya sa comeback ng Gilas matapos nilang malaglag sa mainit na 26-8 simula ng Falcons.
Bukod dito, ang defensive stop na iyon ang nagbigay-daan para hindi masayang ang mga kabayanihan ng kanyang mga kakamping sina CJ Perez at Kevin Quiambao, na kapwa nanguna sa napakalaking pagbalik ng Pilipinas sa second half.
Nagtapos si Perez na may 16 puntos, kabilang ang apat na sunod na puntos na nagdala sa laro sa overtime bago niya ipinagpatuloy ang kanyang magandang laro sa extra period, na tinapos sa pamamagitan ng malaking assist kay “KQ” para sa go-ahead trifecta.
Samantala, nagtala si Quiambao ng 14 puntos, kabilang ang dalawang poster dunks, habang umangat ang talented winger matapos ma-injure sa bukung-bukong si Carl Tamayo sa unang bahagi ng third quarter.
Huling nanalo ang Pilipinas noong Nobyembre 2025 nang walisin nila ang Guam sa dalawang laro sa Window 1.
Mula sa 16 na koponan, 12 na lamang ang natitira sa Asia and Oceania group, na nahahati sa dalawang grupo na may tig-anim na koponan.
Gaganapin ang Window 5 mula Nobyembre 23 hanggang Disyembre 1, habang ang Window 6 o finals ay mula Pebrero 2 hanggang Marso 2, 2027.
Pitong koponan ang makakakuha ng puwesto sa 2027 World Cup — ang top three sa bawat grupo, kasama ang pinakamagandang fourth-place team. Awtomatikong kwalipikado ang Qatar bilang host.