PUERTO PRINCESA CITY – Tinutulungan ng Department of Science and Technology (DOST) ang anim na pilot municipalities sa Palawan na bumuo ng roadmap para maging smart at sustainable communities gamit ang science, technology, and innovation (STI).
Ayon kay DOST Provincial Director Engr. Pacifico Sariego III, kabilang sa pilot towns ang Dumaran, Narra, Aborlan, Brooke’s Point, Bataraza, at Quezon, kung saan nagsimula ang planning noong 2024.
Target ng roadmap na tulungan ang local government units (LGUs) na magtakda ng objectives at tukuyin ang priority projects na maaaring suportahan ng DOST.
“Ang importante ay makapag-set sila ng objective, magkaroon ng roadmap, at tinutulungan natin sila do’n. Kung anong ma-identify na priority project nila do’n within the roadmap na na-prioritize na, tinitingnan ni DOST kung paano makatulong sa pag-implement,” sabi ni Sariego.
Pero aminado siyang hamon pa rin ang pagkumbinsi sa ilang LGUs na yakapin ang konsepto ng smart communities dahil hindi pa lubos na nauunawaan ang digital transformation.
Kabilang sa trabaho ng DOST ang pagpapaliwanag sa advantages at disadvantages nito at kung paano ito maisasama sa kasalukuyang programa ng LGUs.
“Challenge ay ‘yong buy-in nila. Kung wala silang buy-in, hindi nila papansinin ang ganyang programa,” sabi ni Sariego.
Tinitingnan din ng DOST ang mga serbisyong maaaring ibigay ng ibang government agencies, kabilang ang Department of Information and Communications Technology (DICT), para suportahan ang digital transformation ng LGUs.
Tinalakay rin ang smart community initiatives sa technology forum ng Regional Science and Technology Week (RSTW), kung saan pinalakas ang kaalaman ng pilot LGUs at ipinakilala ang programa sa mga munisipalidad na hindi pa kabilang dito.
Tiniyak naman ni Roche Rosas Tolentino ng Uplink Integrated/Hyperion OPC na hindi layunin ng paggamit ng artificial intelligence (AI) na palitan ang government employees kundi mapahusay ang public services, kabilang ang pagbibigay ng responses sa public queries at transactions nang hindi kailangang hintayin ang regular office hours.
“Hindi natin gusto na maglagay ng bagong programa na pandagdag sa hirap ng mga local government na nagpapatupad ng mga programa. Bagkus, makatulong at the end ay ma-attain ang objectives,” dagdag ni Sariego. /Bistado