Nanguna si Vice President Sara Duterte sa maagang presidential derby para sa 2028, habang si Sen. Christopher “Bong” Go ang top choice sa pagka-bise presidente, batay sa July 2026 survey ng Pulse Asia Research Inc.
Sa presidential long list, 49 porsiyento ng mga respondent ang pumili kay Duterte. Pumangalawa si dating vice president at ngayo’y Naga City Mayor Leni Robredo sa 26 porsiyento, kasunod si Sen. Raffy Tulfo sa 14 porsiyento.
Kapwa nakakuha ng tig-isang porsiyento sina Department of Public Works and Highways (DPWH) Secretary Vince Dizon at Baguio City Mayor Benjamin Magalong. Nasa 0.1 porsiyento naman si Metropolitan Manila Development Authority (MMDA) General Manager Nicolas Torre III.
Apat na porsiyento ang undecided, apat na porsiyento ang walang pinili at isang porsiyento ang tumangging sumagot.
Pinakamalakas ang suporta kay Duterte sa Mindanao, kung saan nakakuha siya ng 87 porsiyento. Nagtala rin siya ng 53 porsiyento sa Visayas at 59 porsiyento sa Class E.
Dikit sina Duterte at Robredo sa Metro Manila, 39 porsiyento laban sa 38 porsiyento. Tabla sila sa rest of Luzon sa tig-31 porsiyento.
Sa three-way race nina Duterte, Robredo at Raffy Tulfo, nanguna ang bise presidente sa 51 porsiyento. Sumunod sina Robredo sa 27 porsiyento at Tulfo sa 16 porsiyento.
Kapag sina Duterte, Sen. Erwin Tulfo at Sen. Risa Hontiveros ang magkatapat, nakakuha ang bise presidente ng 56 porsiyento, kumpara sa 16 porsiyento ni Tulfo at 13 porsiyento ni Hontiveros.
Umabot naman sa 57 porsiyento si Duterte laban kina Erwin Tulfo, 16 porsiyento, at Sen. Bam Aquino, 15 porsiyento.
Sa one-on-one scenario, lamang si Duterte kay Robredo, 52 porsiyento laban sa 39 porsiyento. Nagtala rin siya ng 60 porsiyento laban sa 21 porsiyento ni Hontiveros.
Sa vice presidential long list, nanguna si Go sa 27 porsiyento. Sumunod si Sen. Robin Padilla sa 21 porsiyento, habang tabla sa 14 porsiyento sina Aquino at dating senador Grace Poe.
Nakakuha si Erwin Tulfo ng siyam na porsiyento, Sen. Kiko Pangilinan ng apat na porsiyento at Torre ng 0.5 porsiyento.
Sa senatorial survey, nanguna si Padilla sa 48.4 porsiyento. Kasunod sina Pasig City Mayor Vico Sotto sa 47.9 porsiyento, Raffy Tulfo sa 43.9 porsiyento, Sen. Alan Peter Cayetano sa 43.2 porsiyento at Sen. Loren Legarda sa 40.3 porsiyento.
Umabot sa 17 sa 53 personalidad ang may statistical chance na makapasok sa winning circle. Kabilang din dito sina Manny Pacquiao, Nancy Binay, Sonny Angara, Mark Villar, Ben Tulfo, Jinggoy Estrada, Willie Revillame, Chiz Escudero, Mike Defensor, Mar Roxas, Benhur Abalos at Mark Lapid.
Isinagawa ang survey mula June 28 hanggang July 3 at July 6 sa 2,400 adults. May plus or minus two percentage points itong nationwide error margin. Umabot sa 89 porsiyento ang nagsabing interesado sila sa May 2028 elections, kahit halos dalawang taon pa bago ang botohan. /Bistado