Sisipot sa Senate impeachment court sa Martes, July 21, si National Bureau of Investigation (NBI) Director Melvin Matibag kahit may nakatakda siyang regional conference sa Bangkok, Thailand.
Kinumpirma ito nitong Huwebes ni House private prosecutor Atty. Lorna Kapunan.
“The short answer to your question is yes. He will be here on Tuesday,” pahayag ni Kapunan sa press conference sa Kamara.
Nilinaw niyang hindi tumangging humarap si Matibag. Nagkasabay lamang ang kanyang pagtestigo at international engagement.
“It was just a function of scheduling,” ani Kapunan. “It was not that he refused to go. It was just a matter of scheduling.”
Hindi kinumpirma ni Kapunan ang paksa ng conference. Nauunawaan naman umano ni Matibag na dapat unahin ang kanyang pagharap sa impeachment trial.
“The impeachment must be given paramount importance compared to all of those conferences,” diin niya.
Si Matibag ang ikatlo at huling testigo ng House prosecution sa ilalim ng Artikulo IV. Inaasahang tatalakayin niya ang mga nangyari matapos tapusin ng NBI Cybercrime Division ang imbestigasyon, ang kasalukuyang lagay ng usapin sa bureau at kung may nagpapatuloy pang imbestigasyon.
Nauna nang tumestigo ang NBI officials na sina John Mark Calilung at Atty. Jeremy Lotoc.
Tinalakay ni Calilung ang pagkuha at pagpapatunay sa recording ng November 23, 2024 online press conference ni Vice President Sara Duterte. Inilahad naman ni Lotoc ang imbestigasyon ng Cybercrime Division at rekomendasyon ng NBI na magsampa ng tatlong bilang ng grave threats at isang bilang ng inciting to sedition.
Saklaw ng Artikulo IV ang mga pahayag ni Duterte laban kina President Ferdinand Marcos Jr., First Lady Liza Araneta-Marcos at dating Speaker Ferdinand Martin Romualdez.
Matapos ang testimonya ni Matibag, tutungo ang prosekusyon sa Artikulo I kaugnay ng umano’y maling paggamit at iregular na paggastos ng confidential funds sa Office of the Vice President at Department of Education. /Bistado