Lumabas na ng Philippine Area of Responsibility (PAR) ang Typhoon Inday nitong Sabado pero nananatili ang Tropical Cyclone Wind Signal No. 1 sa Batanes.
Huling namataan alas-10 ng umaga ang sentro ng bagyo sa layong 590 kilometro hilaga-hilagang-silangan ng Itbayat, Batanes. Nasa labas na ito ng PAR at may koordinatong 25.6°N, 124.2°E.
Taglay pa rin ni Inday ang maximum sustained winds na 140 kilometro kada oras malapit sa sentro at pagbugsong umaabot sa 170 kilometro kada oras. Nasa 950 hectopascals ang central pressure nito.
Kumikilos ang bagyo pahilaga-hilagang-kanluran sa bilis na 20 kilometro kada oras.
Umaabot hanggang 880 kilometro mula sa sentro ang malalakas na hangin hanggang typhoon-force winds.
Bagama’t nasa labas na ng PAR ang bagyo, Signal No. 1 pa rin ang nakataas sa Batanes.
Sa ilalim ng signal na ito, inaasahan ang hanging may bilis na 39 hanggang 61 kilometro kada oras. May warning lead time itong 36 oras at minimal hanggang minor na banta sa buhay at ari-arian.
Nagbabala ang Pagasa na puwedeng bahagyang lumakas ang lokal na hangin sa mga baybayin, matataas na lugar at kabundukang lantad sa bugso. Mas mahina naman ang hangin sa mga lugar na protektado mula sa umiiral na direksiyon nito.
Hindi rin dapat magpakampante ang ibang bahagi ng bansa dahil pinalalakas ng Habagat at panlabas na bahagi ng Typhoon Inday ang bugso ng hangin.
Ngayong Sabado, malakas hanggang gale-force na pagbugso ang inaasahan sa malaking bahagi ng bansa, lalo na sa mga baybayin at matataas na lugar na lantad sa hangin.
Bukas, Hulyo 12, posibleng maranasan ang malalakas na pagbugso sa malaking bahagi ng Luzon at Visayas, Zamboanga del Norte, Misamis Occidental, Lanao del Norte, Camiguin at Davao Oriental.
Sa Lunes, Hulyo 13, apektado naman ng malakas na pagbugso ang malaking bahagi ng Luzon, Western Visayas at Negros Occidental.
Pinayuhan din ang publiko na bantayan ang hiwalay na Heavy Rainfall Outlook dahil sa Southwest Monsoon o Habagat. /Bistado