Itinalaga ni President Ferdinand Marcos Jr. si dating Interior Secretary Benhur Abalos bilang Cabinet Secretary, hudyat ng kanyang pagbabalik sa Gabinete matapos matalo sa 2025 Senate race.
Inanunsyo ni Palace press officer Undersecretary Claire Castro ang appointment nitong Miyerkules, July 8. Nakatakdang manumpa si Abalos sa parehong araw.
Ayon kay Castro, tutulong si Abalos kay Marcos sa pagbibigay ng “timely, relevant, and strategic advice on emerging national, local, and international issues affecting the political landscape.”
Saklaw ng trabaho ni Abalos ang engagements ng Pangulo sa national government agencies, local government units, political organizations, civil society groups, at sectoral groups pagdating sa political concerns.
Pamumunuan din ni Abalos ang Strategic Action and Response Office, na nangangasiwa sa complaints centers ng Malacañang.
Dumating ang appointment matapos lumipas ang one-year ban sa pagtatalaga sa natalong kandidato sa mga government post.
Nagbitiw si Abalos bilang chief ng Department of the Interior and Local Government (DILG) noong 2024 para tumakbong senador sa ilalim ng administration-backed Alyansa Para sa Bagong Pilipinas slate.
Pumuwesto siya sa ika-16 sa 2025 Senate race matapos makakuha ng 11.5 million votes.
Bago pumasok sa Marcos Cabinet noong 2022, nagsilbi si Abalos bilang chairman ng Metropolitan Manila Development Authority (MMDA).
Siya rin ang campaign manager ni Marcos noong 2022 presidential race at humawak ng Metro Manila campaign nito noong natalo si Marcos sa 2016 vice presidential bid.
Matapos manalo si Marcos sa pagkapangulo, itinalaga niya si Abalos bilang Interior secretary. Pinalitan siya kalaunan ni dating Cavite governor Juanito Victor “Jonvic” Remulla matapos bumaba sa puwesto para sa Senate bid.
Dati ring nagsilbi si Abalos ng limang termino bilang Mandaluyong mayor. Nagtapos siya ng history and political science sa De La Salle University at law degree sa Ateneo de Manila University.
Anak siya ni dating Commission on Elections Chairman Benjamin Abalos Sr., na matagal nang kinikilala sa politika ng Mandaluyong. /Bistado