Pwede nang mag-renew ng National Bureau of Investigation (NBI) Clearance online sa eGovPH Super App matapos ilunsad ng Department of Information and Communications Technology (DICT) at NBI ang NBI eClearance.
Pormal na inilunsad ang serbisyo noong July 6 sa Pasay City, alinsunod sa direktiba ni Pangulong Ferdinand Marcos Jr. na gawing mas mabilis, simple, at accessible ang serbisyo ng pamahalaan.
Pinangunahan ni First Lady Louise Araneta-Marcos ang ceremonial launch kasama sina DICT Secretary Henry Aguda, NBI Director Atty. Melvin Matibag, DICT Undersecretary David Almirol Jr., at NBI Deputy Director Antonio Pagatpat.
Sa pamamagitan ng NBI eClearance, pwede nang mag-renew online ang verified users ng eGovPH Super App, ma-access ang digital copy ng renewed clearance, at makuha ang pinakabagong issued clearance sa app.
Ayon sa DICT at NBI, bahagi ito ng mas malawak na digitalization push ng pamahalaan para mailapit ang essential government services sa publiko at mabawasan ang abala sa transaksyon.
Target ng serbisyo na gawing mas mabilis ang pagkuha ng clearance para sa mga Pilipinong kailangan ito sa trabaho, requirements, at iba pang transaksyon.
Sa bagong sistema, mas pinapalawak ng gobyerno ang eGovPH Super App bilang one-stop digital platform para sa serbisyo ng estado. /Bistado