Nakalikom ng P1.5 billion ang listed fuel distributor at retailer na Top Line Business Development Corp. (TOP) mula sa oversubscribed follow-on offering ng perpetual preferred shares, para palawakin ang fuel importation at storage capacity nito sa Visayas.
Inilista ng Cebu-based company nitong Biyernes sa Philippine Stock Exchange (PSE) ang Series A perpetual preferred shares nito sa ilalim ng ticker symbols na TOPA1 at TOPA2.
Binubuo ang offering ng P1 billion firm shares at P500 million oversubscription shares, indikasyon ng malakas na investor appetite sa kabila ng hamon sa downstream oil industry.
May annual dividend rate na 9.1325 percent ang TOPA1, habang 9.5981 percent naman ang TOPA2.
Gagamitin ang proceeds para palakasin ang vertically integrated fuel business ng kumpanya. Hanggang P1 billion ang ilalaan sa working capital kaugnay ng petroleum importation, kabilang ang fuel procurement, shipping, at freight costs.
Nasa P440 million naman ang gagamitin para sa construction at renovation ng fuel depots na may combined storage capacity na hanggang 40 million liters. Ang natitirang pondo ay gagamitin para sa general corporate purposes.
Ayon kay Chairman, President and Chief Executive Officer Erik Lim, tutok ang kumpanya sa long-term growth potential ng Visayas kahit may headwinds sa fuel sector.
“With this successful offering, we intend to help address gaps in the Visayas fuel supply chain by ensuring that we have sufficient supply, storage capacity, and distribution capabilities to meet the region’s growing demand,” sabi ni Lim.
Pinatitibay ng capital raising ang estratehiya ng TOP na lumawak mula fuel retailing tungo sa importation at logistics, para makakuha ng mas mataas na margins at mapahusay ang supply reliability.
Maaari ring bawasan ng dagdag depot capacity ang pag-asa sa third-party storage at palakasin ang competitive position ng kumpanya sa rehiyong patuloy na lumalampas ang fuel demand sa infrastructure development.
Nagsilbing sole issue manager ang PNB Capital and Investment Corp., habang ang Security Bank Capital Investment Corp. ay kasama bilang lead underwriter at bookrunner. /Bistado