Kasado na ang coconut industry rehabilitation plan sa tatlong lalawigan sa Northern Mindanao, bilang bahagi ng mas malawak na hakbang ng pamahalaan upang palakasin muli ang produksyon at kabuhayan ng mga magniniyog sa rehiyon.
Ayon sa Department of Agriculture (DA) Region 10, layunin ng programa na tugunan ang mababang ani, tumatandang puno ng niyog at kakulangan sa modernong suporta sa mga magsasaka.
Kabilang sa plano ang pagpapalit ng mga hindi na produktibong puno, pamamahagi ng de-kalidad na punla, at pagbibigay ng teknikal na tulong upang mapataas ang produksyon kada ektarya.
Paliwanag ng DA, malaking bahagi ng suplay ng niyog sa rehiyon ay nagmumula sa maliliit na magsasaka, kaya nakatuon ang rehabilitasyon sa pagpapalakas ng kanilang kapasidad. Kasama sa hakbang ang pagsasanay sa tamang pagtatanim, pest management at pagpapabuti ng post-harvest handling upang maiwasan ang pagkalugi.
Bibigyang-diin din ng ahensya ang pagpapalawak ng market linkages para sa copra at iba pang coconut-based products. Layunin nitong masiguro na hindi lamang produksyon ang tataas kundi pati kita ng mga magsasaka.
Nakikipag-ugnayan ang DA sa mga lokal na pamahalaan at kooperatiba upang maipatupad nang maayos ang programa sa komunidad. /Bistado