Pinagmulta ng Securities and Exchange Commission (SEC) ang HC Consumer Finance Philippines, Inc., na mas kilala bilang Home Credit, dahil sa umano’y unfair debt collection practices.
Sa order na may petsang June 3, napatunayan ng SEC Financing and Lending Companies Department na liable ang HC Consumer Finance sa paglabag sa SEC Memorandum Circular No. 18, Series of 2019, (MC 18) at SEC Memorandum Circular No. 5, Series of 2023, o ang SEC Rules and Regulations ng Financial Products and Services Consumer Protection Act of 2022 (MC 5).
Sa ilalim ng MC 18, kabilang sa unfair debt collection practices ang pagkontak sa mga tao sa contact list ng borrower na hindi naman nakapangalan bilang guarantors o co-makers.
Ang parehong gawain ay itinuturing ding abusive debt recovery practice sa ilalim ng MC 5.
Dahil dito, inatasan ang HC Consumer Finance na magbayad ng P50,000 fine para sa first offense nito.
Pinahinto rin ang kumpanya sa pagkolekta ng utang mula sa mga indibidwal na hindi guarantors o co-makers sa loan.
Inatasan din itong tumigil sa paggamit ng mga third-party residence bilang collection venues.
Bukod dito, pinare-review at pinare-revise ng SEC sa kumpanya ang collection policies at procedures nito, at pinagsusumite ito ng compliance report.
Nagsimula ang kaso sa reklamo ng isang borrower na nagsabing nagsagawa ang HC Consumer Finance ng collection activities sa isang third-party residence na tinitirhan ng mga taong hindi guarantors o co-makers sa kanyang loan obligation.
Ayon sa complainant, ipinagpatuloy umano ng HC Consumer Finance ang collection activities sa parehong bahay kahit may written objection na mula sa borrower.
“The use of a third-party residence as a collection venue necessarily creates a substantial risk that the existence of the debt, the borrower’s financial condition, or the fact of delinquency will become known to persons who have no lawful interest in the transaction. Such exposure is precisely what the FCPA, MC 18, and MC 5 seek to prevent,” ayon sa SEC order.
Dagdag pa ng SEC, malinaw sa kabuuang ebidensiya na lumampas ang kumpanya sa hangganang itinakda ng batas sa paraan ng paniningil.
“The totality of the evidence on record establishes that [HC Consumer Finance], under the pretext of enforcing a valid obligation, transgressed the clear and non-waivable boundaries imposed by law on the manner of debt collection,” dagdag ng SEC. /Bistado