Umabot sa 233 suspek ang naaresto sa iba’t ibang anti-criminality operations ng Quezon City Police District (QCPD) mula Pebrero 22 hanggang 28, ayon sa ulat ng pulisya.
Ang mga operasyon ay isinagawa sa iba’t ibang barangay sa lungsod bilang bahagi ng mas pinaigting na kampanya laban sa kriminalidad.
Ayon sa QCPD, karamihan sa mga nahuli ay mga wanted persons, may mga kasong paglabag sa Comprehensive Dangerous Drugs Act at iba pang paglabag sa batas. Sinabi ng pulisya na sa kabuuang 233 naaresto, mahigit 100 ang may drug-related cases, habang ang iba ay kabilang sa mga wanted persons sa mga kasong pagnanakaw, physical injury at iba pang kriminal na aktibidad.
Sa mga operasyon, nakumpiska rin ng pulisya ang iba’t ibang iligal na droga kabilang ang shabu, marijuana at iba’t ibang drug paraphernalia.
Iginiit ng QCPD na ang mga operation ay isinagawa batay sa mga warrant of arrest at intel reports na tinipon sa iba’t ibang bahagi ng lungsod. Ang mga inarestong suspek ay agad dinala sa mga istasyon ng pulisya para sa legal processing.
Nagmula rin sa mga barangay clearance at checkpoint operations ang ilang pagdakip ng mga wanted persons. Habang nagpapatuloy ang mga community-based operations, inuudyok ng kapulisan ang mga residente na maging aktibo sa pagbibigay ng impormasyon sa lokal na istasyon kung may napapansin silang kahina-hinalang kilos o kriminal na aktibidad.
Ayon sa QCPD, ang ganitong uri ng lingguhang pagpapatrolya at ops ay naglalayong pataasin ang seguridad ng komunidad at bawasan ang mga krimen sa lungsod. Anila, ang mga naaresto at mga nakumpiskang ebidensya ay “mahusay na hakbang” para maipatupad ang batas at mas maprotektahan ang publiko. /Bistado