BACOLOD CITY – Sinimulan na sa Bago City, Negros Occidental ang konstruksyon ng 150-megawatt wind power project, ang unang ganitong proyekto sa Negros Island Region.
Pinangunahan ng Bago Negros Energy Corp. (BNEC) ang groundbreaking ceremony sa Barangay Calumangan nitong Miyerkules.
Ayon sa kumpanya, aabot sa P9.78 billion ang initial project cost ng wind power project.
Plano ng BNEC na magtayo at mag-operate ng 23 wind turbine generators para makatulong sa pagpapalakas ng power supply sa Visayas grid at sa national renewable energy roadmap.
“We are not only witnessing the start of a structure, we are witnessing the beginning of a legacy. This project is a symbol of what we can achieve when vision meets collaboration. When government, private sector, and community come together not just for development, but for sustainable development,” ani Bago City Mayor Marina Javellana-Yao.
Dumalo rin sa groundbreaking ceremony sina Vice Mayor Andrew Torres, BNEC vice president Passakorn Panyaratanakorn, PowerChina Philippines Corp. deputy country representative Li Hongjiang, at Department of Energy Renewable Energy Management Bureau Assistant Director Ruby de Guzman.
“This is our first project in the Philippines. Right now, we have put our focus on the Philippine market. This is going to be our first, that’s why we would like it to be a hundred percent success,” ani Panyaratanakorn.
Ang BNEC ay suportado ng Thailand-based renewable energy developer na Sermsang Power Corp. Public Co. Ltd.
Nakalista rin sa official website ng Sermsang Power ang Bago City Wind Power Project bilang isa sa mga proyekto nito.
Para sa DOE, malaking hakbang ito sa renewable energy push ng Negros Occidental.
“You have diverse renewable energy resources. With this 150-MW wind power project, we are seeing that Bago City is now becoming the rising renewable energy hub in Negros Occidental,” ani De Guzman.
Inaasahang aabutin ng humigit-kumulang isang taon ang konstruksyon ng proyekto.
Batay sa executive summary ng proyekto, ginawaran ng DOE ang Bago City Wind Power Project ng service contract area na may lawak na 5,265 hectares.
Sakop nito ang core operational facilities ng wind power plant, substation, access road, support facilities, at iba pang supplementary areas.
Aabot sa pitong barangay ang sakop ng proyekto: Sampinit, Taloc, Calumangan, Busay, Lag-asan, Balingasag, at Napoles.
Sa Barangay Napoles ilalagay ang substation at 10 wind turbine generators.
Pitong turbines naman ang itatayo sa Busay, tatlo sa Calumangan, at tig-isa sa Taloc, Sampinit, at Lag-asan.
Sa pagsisimula ng proyekto, umaasa ang lokal na pamahalaan at energy officials na magiging mas malakas ang papel ng Bago City sa renewable energy development sa Visayas. /Bistado