Nagbalik ang laro ni RJ Abarrientos samantalang nanatili ang pwersa ni Justin Brownlee upang tulungang bumangon ang Barangay Ginebra, 111-104, tungo sa 3-2 abante kontra Rain Or Shine sa PBA Season 50 Commissioner’s Cup semi final showdown.
Sa harap ng halos 12,000 fans noong Biyernes sa Smart Araneta Coliseum sa Quezon City, nagsama sina Abarrientos at Brownlee para sa 63 puntos at pinangunahan ang Gin Kings patungo sa bingit ng finals berth.
Isang panalo sa Linggo sa Ynares Center Antipolo ang magbabalik sa Gin Kings sa Commissioner’s Cup finals.
Ang winner-take-all Game 7, kung kinakailangan, ay gaganapin sa Miyerkules.
“We’re not gonna be happy with this win. This game is done and over with, and we have to move on and be locked in for Sunday’s game,” ani Ginebra coach Tim Cone.
“It’s easy to think that you’re there (in the finals), but you’re not. You still need to work for it.”
Ani Abarrientos, kailangan nilang maging agresibo sa opensa at depensa.
“Sana patuloy na maayos ang ginagawa namin. Sana magtuloy-tuloy,” dagdag ni Abarrientos, matapos manalo ng Game 5 Best Player honors sa kanyang 31-point explosion. “Siguro nag-work out ang gusto naming gawin sa opensa at depensa. ‘Yung adjustments namin nagbigay sa amin ng magandang flow sa game.”
Mula sa 15 puntos na pagkaka-iwan, nakabawi ang Elasto Painters at nakalapit sa tatlong puntos lamang sa third-quarter rally na pinangunahan ni Adrian Nocum.
Gayunman, mabilis na napigilan ng Gin Kings ang pagbangon ng ROS at muling nakuha ang kontrol sa pamamagitan ng 12-point lead matapos ang buzzer-beating four-ball ni Abarrientos.
Nanguna sa scoring si Brownlee na may 32 puntos habang nagdagdag si Troy Rosario ng 16 at nagbigay rin ng mahahalagang kontribusyon ang bench.
Nagtapos si Nocum na may 25 puntos habang nagtala si Johnson ng 22 puntos at 14 rebounds at si Jhonard Clarito ay may 20 puntos at 10 rebounds para sa ROS.
Sa first game, tinupad ni import Chris McCullough ang pangakong mas mahusay na performance matapos umiskor ng 42 puntos upang pamunuan ang TNT sa 103-95 panalo kontra Meralco at sa kaparehong 3-2 abante.
Ang puntos na iyon ay 18 higit kaysa sa kanyang naitala sa unang laro matapos bumalik at lalo niya itong pinatingkad sa pamamagitan ng apat na sunod na basket — magkasunod na tres, isang spin move at isang jumper — na nagbigay sa Tropang 5G ng 98-91 kalamangan.
Pagkatapos, inihatid ni Jordan Heading ang TNT sa panalo sa pamamagitan ng limang sunod na puntos na nagpalobo sa iskor sa 103-93.
Nangako si McCullough ng pagbabalik at ganti sa 90-101 pagkatalo sa Game 4 noong Miyerkules kung saan tumira lamang siya ng 7-of-22 mula sa field.
“I just needed to get my legs under me. I had two weeks off from playing basketball so I’m just happy to be back, happy to be playing,” ani McCullough.
The scores:
First Game
TNT 103 – McCullough 42, Heading 22, Pogoy 16, Oftana 12, Castro 6, Ganuelas-Rosser 3, Aurin 2, Galinato 0, Nambatac 0, Williams 0, Ferrer 0, Khobuntin 0.
MERALCO 95 – Gardner 25, Banchero 12, Hodge 12, Black 11, Mocon 10, Newsome 10, Quinto 4, Cansino 4, Rios 3, Brickman 2, Bates 2, Almazan 0.
Quarters: 22-19; 41-42; 76-72; 103-95
Second Game
GINEBRA 111 – Brownlee 32, Abarrientos 31, Rosario 16, Thompson 9, Holt 8, Cu 8, Gray 3, Pinto 2, J. Aguilar 2, Go 0
RAIN OR SHINE 104 – Nocum 25, Johnson 22, Clarito 20, Mamuyac 11, Tiongson 10, David 6, Santillan 5, Malonzo 4, Caracut 1, Asistio 0, Manaytay 0.
Quarters: 31-26; 56-44; 83-71; 111-104