Bahagyang gumanda ang outlook ng Philippine businesses para sa susunod na 12 buwan, kahit nananatiling mabigat ang epekto ng Middle East conflict sa business confidence nitong April, batay sa pinakahuling survey ng Bangko Sentral ng Pilipinas (BSP).
Sa April Business Expectations Survey ng BSP, umangat ang three-month-ahead confidence index mula -17.3 percent tungo sa -7.5 percent. Ibig sabihin, mas kaunti na ang pessimistic o negatibo ang pananaw sa susunod na tatlong buwan kumpara sa nakaraang survey.
Mas lumakas din ang 12-month-ahead confidence index, mula 11.7 percent tungo sa 19.5 percent.
“Firms were less pessimistic about the next three months mainly because the start of the academic year for most schools is expected to drive demand for loans and financing products, as well as for clothing and apparel,” saad ng BSP.
“Looking 12 months ahead, they were more optimistic due to anticipated stronger demand for business process outsourcing, construction, and transportation services,” dagdag nito.
Ayon sa central bank, binanggit din ng respondents ang inaasahang pagtaas ng sales at income, mas magandang overall economic conditions, at posibleng resolution ng Middle East conflict bilang dagdag na dahilan sa mas maayos na outlook.
May positibong senyales din sa hiring intentions. Ang three-month-ahead index ay umakyat mula -0.1 percent tungo sa 6.1 percent, habang nanatiling positive ang 12-month-ahead index sa 9.5 percent.
Pero hindi lahat ng signal ay malakas. Mas maliit na bahagi ng industry firms ang nagsabing may expansion plans sila, sa gitna ng elevated fuel prices at mas mataas na uncertainty.
Para sa April lamang, bumaba ang current confidence index sa -35.8 percent, mula -24.3 percent noong March. Ayon sa BSP, hinila pababa ng concerns sa Middle East situation ang business confidence dahil nananatiling mataas ang oil prices.
Sinabi rin ng BSP na ayon sa firms, maaaring magpataas ng operating costs ang mas mataas na inflation at makabawas sa purchasing power ng consumers.
Ang Business Expectations Survey ay monthly survey ng firms na kinukuha sa pamamagitan ng stratified random sampling mula sa Bureau van Dijk database ng Top 7,000 Corporations batay sa total assets noong 2017.
Ayon sa BSP, ginagamit ang survey bilang advance indication ng posibleng direksyon ng overall business activity sa ekonomiya, pati ng iba’t ibang measures ng company operations at selected economic indicators.
Kinukuwenta ang business confidence index bilang porsyento ng firms na sumagot nang positive, bawas ang porsyento ng firms na sumagot nang negative tungkol sa overall business outlook.
Sa April survey round, 507 firms ang sinurvey sa buong bansa. Kabilang dito ang 193 companies sa National Capital Region at 314 firms sa labas ng NCR, na sumasaklaw sa lahat ng 18 regions sa bansa. /Bistado