Umabot na sa 7,674 overseas Filipino workers (OFWs) at kanilang mga dependent ang nakabalik sa Pilipinas mula nang sumiklab ang Middle East crisis halos dalawang buwan na ang nakalipas, ayon sa Department of Migrant Workers (DMW) nitong Sabado.
Sa tala ng ahensiya, 7,051 ang na-repatriate sa pondo ng gobyerno. Kabilang sa government-funded repatriation ang 5,669 OFWs at 1,382 dependents.
Ayon sa pahayag ng ahensiya, ipagpapatuloy ng Marcos administration ang mga hakbang para maibalik ang mas marami pang Pilipinong humihiling na makauwi. Pinananatili rin ng pamahalaan ang repatriation at reintegration program, ayon sa direktiba ni Pangulong Ferdinand Marcos Jr., para matiyak ang kaligtasan ng mga OFW at masuportahan ang maayos nilang pagbabalik at panibagong pagsisimula sa bansa.
Lumawak na sa mga karatig na Gulf states ang conflict, ayon sa ulat na binanggit ng DMW.
Nagsimula ang pagputok nito nang magsagawa ang Israel at ang US ng joint military operation laban sa nuclear sites at leadership ng Tehran noong Feb. 28.
Diin ni DMW Secretary Hans Leo Cacdac, titiyakin ng ahensiya ang safety at welfare ng mga Pilipino sa rehiyon. Naka-ready rin ang DMW sakaling tumaas ang pangangailangan para sa posibleng large-scale repatriation.
Sa ngayon, sinabi ni Cacdac na nakapagtayo na ang DMW ng mga meeting point at exit point. Gumagawa rin ang ahensiya ng fly-out arrangements para sa mga repatriate na uuwi.
Kasabay nito, nakikipag-ugnayan din ang DMW sa Kongreso tungkol sa mga panukalang hakbang para magtatag ng emergency funding mechanisms. Layunin ng mga panukala na mas masuportahan ang mga OFW at kanilang mga pamilya sa panahon ng krisis, ayon sa DMW.
Ipinuwesto ng DMW ang mga hakbang na ito habang patuloy ang krisis at lumalawak ang saklaw ng conflict. Nakaangkla ang operasyon sa mabilis na koordinasyon, malinaw na ruta ng paglabas, at pag-ayos ng biyahe pauwi. /Bistado