Malabo na makalahok si Alexandra “Alex” Eala sa WTA 125 Philippine Women’s Open sa Enero.
Nauna nang sinabi ng Philippine Tennis Association (Philta) na hindi makakalaro si Eala sa torneo na sasabay sa ikalawang linggo ng Australian Open, ang unang grand slam ng taon, dahil sa mga panuntunang pumipigil sa mga manlalarong mataas ang ranggo na sumali sa WTA (Women’s Tennis Association) 125 tournament.
Sinabi ni Philta secretary-general John Rey Tiangco na igagalang nila anuman ang maging desisyon ng kampo ni Eala.
“We understand that Alex remains focused on her remaining tournaments this year, and we respect the decisions of Alex and her team regarding her schedule,” ani Tiangco.
“Should Alex decide to compete, we would certainly welcome her and extend a wildcard entry, subject to tournament rules and approval.”
Sa ilalim ng mga panuntunan ng WTA, maaaring sumali at maglaro sa singles o doubles ng isang WTA 125 tournament ang mga manlalarong nasa ika-21 puwesto pababa sa ranking sa ikalawang linggo ng isang WTA 1000 mandatory tournament o grand slam.
Hindi maaaring direktang sumali sa naturang torneo ang mga manlalarong nasa ika-11 hanggang ika-20 puwesto sa ranking sa takdang petsa ng pagsusumite ng mga entry para sa main draw.
Gayunpaman, hanggang dalawang manlalarong kabilang sa ranggong ito ang maaaring makasali sa pamamagitan ng wildcard.
Kasalukuyang No. 19 sa world ranking si Eala.
“Philta’s priority is to support the growth of Philippine tennis and provide more opportunities for our local players to compete at the international level,” ani Tiangco. “Hosting a WTA tournament in Manila is already a significant milestone for Philippine tennis.”
Bukod sa WTA 125 Philippine Women’s Open, gaganapin din sa Nobyembre 2027 ang isang WTA 250.
Samantala, tuloy sa Philippine Arena sa Bulacan sa Disyembre 8 ang homecoming event na “Alex Eala Live: Game. Set. Celebrate.”
Makakaharap niya ang Indonesian na si Janice Tjen.
“Kumusta, Pilipinas? I’ve got exciting news. I’m coming home. On December 8th, I’ll be playing in the Philippine Arena against Indonesia’s Janice Tjen. Get ready for an unforgettable day of world class tennis and the celebration of national pride designed to inspire the next generation of Filipino tennis players. I can’t wait to share this moment with you and celebrate our culture together,” pahayag ni Eala sa isang nauna niyang video message.
Nasa China ngayon si Eala para sa 3rd BNB Ningbo Open, ang pangalawa sa huli na WTA 500 event ng 2026
Defending champion ang world No. 1 na si Elena Rybakina ng Kazakhstan.
Umpisa na ng main draw sa Lunes at magtatapos sa championships sa Oktubre 25.