Patuloy na ipinamalas ng Choco Mucho ang magandang porma nito sa simula ng season matapos walisin ang ZUS Coffee sa tatlong set, 25-20, 25-17, 25-20, at manatiling walang talo sa 2026 Premier Volleyball League (PVL) All-Filipino Conference Siklab Series nitong Huwebes ng gabi sa Ynares Center sa Antipolo.
Matapos ang kapana-panabik na panalo sa pamamagitan ng reverse sweep kontra Capital1 (22-25, 18-25, 25-17, 25-20, 15-8) sa una nitong laro sa Cebu noong Oktubre 10, hindi nagpakita ng senyales ng paghina ang Flying Titans at kontrolado ang laban mula simula hanggang dulo.
Naghatid si Eya Laure ng mga krusyal na puntos nang tangkain ng ZUS Coffee na pahabain ang laban. Kumana siya ng tatlong puntos sa mahalagang 7-2 run na nagpalaki sa 17-16 kalamangan ng Choco Mucho tungo sa komportableng 24-18 abante sa ikatlong set.
Pansamantalang napigil ni AC Miner ang ratsada ng Flying Titans sa pamamagitan ng down-the-line hit bago napalabas ni Laure ang kanyang atake.
Gayunman, agad na bumawi ang bituin ng Choco Mucho sa pamamagitan ng malakas na atake na tumama sa block at lumabas, upang selyuhan ang panalo sa loob ng 78 minuto.
“Ah, sobrang happy, siyempre, na-control namin ’yung game mula first set hanggang third set. Siguro, nagpakita talaga kami na ’yung ine-ensayo namin, kung ano ’yung puwede naming gawin sa loob, adjustment,” ani head coach Dante Alinsunurin.
“Like, ’yung middle nga nila, alam namin na kayang mag-dominate. Siguro, nag-adjust kami na kailangan namin, every time na nasa amin ’yung serve, kailangan kargahan namin. ’Yun, nakuha namin, kaya sobrang thankful sa game. Kaya ayun, salamat sa panalo,” dagdag niya.
Pinangunahan ni Sisi Rondina-Rosales, na muling nagmula sa bench sa ikalawang sunod na laro, ang opensiba ng Choco Mucho sa naiskor niyang 15 puntos, na lahat ay mula sa mga atake.
Nagdagdag naman si Laure ng 13 puntos at siyam na excellent receptions.
Nag-ambag si Kat Tolentino ng walong puntos at pitong excellent digs, habang gumawa sina Jai Atienza at Caitlin Viray ng lima at apat na puntos, ayon sa pagkakasunod.
Pinangunahan ni Alina Bicar ang opensa sa pamamagitan ng 13 excellent sets, habang patuloy namang nag-aangkop si Dawn Catindig sa kanyang bagong koponan at pinatatatag ang depensa sa likuran sa tulong ng 14 excellent digs.
Nangibabaw ang Choco Mucho sa mga pangunahing statistical category, kabilang ang 50-42 kalamangan sa attacks, 6-2 abante sa blocks, at 3-1 bentahe sa service aces.
Napanatili rin ng Flying Titans sa pinakamababa ang kanilang mga pagkakamali, sa 12 lamang, habang sinamantala ang 16 miscues ng ZUS Coffee.
Susunod na makakaharap ng Choco Mucho ang Farm Fresh sa Oktubre 22, alas-6 ng gabi, sa Mall of Asia Arena sa Pasay City.
Samantala, bumagsak sa 0-1 ang Thunderbelles sa pagsisimula ng kampanya nito sa kumperensiya matapos ang offseason na nasaksihan ang pag-alis ni Thea Gagate patungo sa Denso Airybees, isang koponan sa Japan SV League.
Pinangunahan ni Miner ang ZUS Coffee sa siyam na puntos, na lahat ay mula sa mga atake, habang nagdagdag sina Zam Nolasco at Riza Nogales ng tigpipitong puntos. Nagtapos si Jolina Dela Cruz na may anim na puntos at 13 excellent receptions, habang nagdagdag si Chai Troncoso ng anim na puntos.
Susubukan ng Thunderbelles na makabawi kontra sa Capital1, na nagwagi sa unang laro, sa Oktubre 20 sa Mall of Asia Arena simula 1 p.m.
Nagpakawala si Bella Belen ng dalawang atake sa ikalimang set upang pangunahan ang Capital1 sa pagpapatumba sa Akari, 28-26, 22-25, 25-15, 23-25, 21-19.
Tinuldukan ng three-time UAAP Most Valuable Player ang pinakamataas na 35 puntos sa kanyang karera sa pamamagitan ng magkasunod na off-the-block kills.
Naging angkop itong wakas sa kahanga-hangang all-around performance ni Belen, na nagtala ng triple-double habang umipon ng 20 excellent digs at 19 receptions.
Dahil sa panalong tumagal ng dalawang oras at 33 minuto, naitabla ng Capital1 sa 1-1 ang kartada nito matapos ang limang-set na pagkatalo sa Choco Mucho.
Bumagsak naman sa 0-2 ang Chargers. Natalo rin sila sa Creamline Cool Smashers, 18-25, 21-25, 18-25, sa unang araw ng kompetisyon.
“Masayang maglaro sa mga ganung situations, ‘yung kumbaga -yung challenge talagang nandun. Ang iniisip ko lang kung ano pa ‘yung pwede kong maitulong at kung ano ‘yung kaya kong gawin para sa team,” ani Belen.
Nag-ambag sina Vanie Gandler, Erika Santos at middle blocker Cherry Nunag ng tig-10 puntos para sa Solar Spikers.