Tatlo sa apat na impeachment charges laban kay Vice President Sara Duterte ang hindi na itutuloy ng House prosecution, na magpopokus na lamang sa alegasyon ng unexplained wealth para igiit ang pagpapatalsik sa kanya sa puwesto.
Inanunsiyo ito ni House lead prosecutor at Batangas Rep. Gerville “Jinky Bitrics” Luistro sa Senate Impeachment Court nitong Martes, October 13.
“Today, the prosecution respectfully manifests that it will no longer pursue three of them. It will stand on one, and that is Article II on unexplained wealth,” sabi ni Luistro.
Hindi na ipagpapatuloy ang Article I na may kaugnayan sa confidential funds, Article III sa bribery at Article IV sa threats.
Article II na lamang ang itutuloy, na sumasaklaw sa alegasyon ng unexplained wealth, mga paglabag kaugnay ng Statements of Assets, Liabilities and Net Worth (SALNs), at prohibited business interests.
Ayon kay Luistro, sapat na ang mga ebidensiyang naiharap ng prosecution para patunayan ang mga alegasyon sa Article II.
“We believe that evidence is substantial and compelling, and warrants the respondent’s removal from office for culpable violation of the Constitution and betrayal of public trust,” ani Luistro.
“We believe we have provided sufficient evidence on all these allegations,” dagdag niya.
Nauna nang nagharap ang prosecution ng mga opisyal ng gobyerno, kinatawan ng mga bangko at insurance companies, at forensic accounting expert para suriin ang financial records, ari-arian at business interests ni Duterte.
Sinabi ni Luistro na makatutulong ang pagtutok sa iisang impeachment article upang mabawasan ang mga dokumento at objections na kailangang resolbahin ng impeachment court.
“In the prosecution’s assessment, concentrating on this article is the most judicious course, consistent with the evidence and our duty to the nation,” paliwanag niya.
Binanggit din niya ang impeachment trial ni former Chief Justice Renato Corona, kung saan binawi rin ng prosecution ang ilang articles at itinuloy ang natitirang mga kaso.
Para kay Luistro, may kapangyarihan ang prosecution na magpasya kung aling impeachment charges ang ipagpapatuloy.
Gayunman, wala pang desisyon ang Senate Impeachment Court kung sapat ang mga ebidensiya para ma-convict si Duterte. Ang paninindigan ng prosecution ay hindi pa katumbas ng finding na nagkasala ang bise presidente.
Pansamantalang magbe-break ang Senate impeachment trial at magpapatuloy sa November 9. /Bistado