Midsayap, North Cotabato — Nabigo ang tangkang pagpatay sa isang municipal councilor mula sa Bangsamoro Autonomous Region in Muslim Mindanao (BARMM) matapos pagbabarilin ng dalawang lalaki noong Lunes, ayon sa pulisya.
Kinilala ang biktima na si Al-Hamidie Mohamad, 42, No. 1 town councilor ng Nabalawag, isa sa mga bayan sa BARMM Special Geographic Area.
Ayon kay Capt. Sammy Clarito, deputy police chief ng Midsayap, dumating si Mohamad sa harap ng isang hardware store at pababa na sana ng kanyang Toyota Fortuner nang lapitan ng dalawang lalaking sakay ng motorsiklo. Isa sa mga suspek ang agad na nagpaputok bago tumakas.
Sa kabila ng insidente, nakaligtas si Mohamad sa pamamaril.
Narekober ng mga awtoridad ang siyam na basyo ng bala ng caliber .45 sa pinangyarihan ng krimen sa kahabaan ng national highway sa Barangay Poblacion 8.
Patuloy na tinutugis ng pulisya ang dalawang suspek. Ayon kay Clarito, sinusuri na ng mga imbestigador ang CCTV footage na nakakuha ng mukha ng isa sa mga salarin.
Ani Mohamad, wala siyang alam na kaaway, kaya wala rin siyang police escort.
Patuloy ang imbestigasyon ng pulisya habang inaalam ang motibo sa likod ng pamamaril at tinutukoy ang pagkakakilanlan ng mga suspek. /Bistado