Pinaiimbestigahan ng Philippine National Police (PNP) kung sino ang nasa likod ng kumalat na pekeng ulat na may naganap umanong mass shooting sa De La Salle University-Dasmariñas sa Cavite.
Ayon sa PNP, kumalat sa social media at group chats ang maling impormasyon na may shooting sa campus noong October 1.
“We strongly condemn the irresponsible spread of fake news on social media that causes undue panic and confusion among students, parents, and the general public, and I assure everyone that our local units immediately verified these claims and found them to be completely baseless,” sabi ni PNP Chief Gen. Jose Melencio Nartatez Jr.
Agad rumesponde ang Dasmariñas Component City Police Station (CCPS) matapos matanggap ang report.
Masusing nag-verify ang Investigation Section nito pero walang nakitang factual basis na nagpapatunay na may naganap na mass shooting.
Nilinaw din ng pulisya ang hiwalay na insidente sa De La Salle Medical and Health Sciences Institute sa Barangay Burol Main.
Noong September 30, isang patay na tao ang natagpuan sa loob ng sasakyan sa lugar. Binigyang-diin ng pulisya na hiwalay ito at walang kaugnayan sa kumalat na mass shooting rumor.
Nagbabala rin ang PNP laban sa mga post na pinag-uugnay ang dalawang insidente o inilalarawan ang namatay bilang casualty ng umano’y shooting.
Inatasan ni Nartatez ang Dasmariñas CCPS na paigtingin ang cyberpatrols at police visibility habang tinutukoy kung sino ang nasa likod ng pagpapakalat ng maling impormasyon.
“Those who deliberately create or spread false information that causes public alarm may face appropriate legal consequences. Freedom of expression must be exercised responsibly and should never be used to mislead the public,” ani Nartatez.
“We remind the public that sharing unverified information can have serious consequences. We encourage everyone to verify facts first and help prevent the spread of misinformation,” dagdag niya. /Bistado