Nakatanggap ng inward remittances mula China at iba pang bansa ang Cale88 Foods Corp., isa sa mga kumpanyang sinusuri kaugnay ng impeachment case ni Vice President Sara Duterte, batay sa summaries ng Anti-Money Laundering Council (AMLC) na isinumite sa Senate Impeachment Court.
Kinumpirma ito ni House lead prosecutor at Batangas Rep. Gerville “Jinky Bitrics” Luistro matapos ang pagdinig nitong Huwebes.
“That is correct. That’s part of the summaries prepared and submitted by the AMLC to the Honorable Impeachment Court, summary of remittances to Calle 88 from China and from other foreign countries,” sabi ni Luistro.
Kabilang ang Cale88 sa 15 juridical persons na sakop ng financial records na isinumite ng AMLC kaugnay ng Article II ng impeachment case.
Kasama sa AMLC records na nakatakdang talakayin sa impeachment court ang inflow at outflow transactions, covered transaction reports o CTRs at suspicious transactions.
“Ang kanilang testimony pertains to inflow and outflow transaction, CTRs (covered transaction reports)… and suspicious transactions,” ani Luistro.
Hindi muna ibinunyag ng lead prosecutor ang halaga ng remittances, mga nagpadala, petsa at iba pang bansang pinagmulan ng pera.
“I cannot, because this will cost me P30,000,” biro ni Luistro nang hingan ng detalye, na tumutukoy sa posibleng sanction sa ilalim ng sub judice rule ng impeachment court.
Naitanong din kung may koneksiyon ang China remittances kay businessman Jaime T. Cruz, na lumitaw sa corporate records na naunang tinalakay sa impeachment trial.
Nauna nang lumitaw sa proceedings na sina Cruz at Duterte ay original subscribers sa Metro City Chow Foods Corp. Lumitaw din ang JTC Group of Companies Philippines Inc. bilang pinakamalaking corporate subscriber ng GenCorp Industries Inc.
Sa naunang testimony, kinumpirma rin ni Davao City Mayor Sebastian “Baste” Duterte na business partner niya si Cruz sa Chinese Gen Bee Foods Corp.
Itinalaga naman si Cruz bilang special envoy to China for trade and investments noong administrasyon ni former President Rodrigo Duterte.
Pero walang iniugnay si Luistro sa Cale88 remittances kay Cruz.
“As to whether or not the testimony will include something which pertains to JTC, that is yet to be known during their presentation,” sabi niya.
Hindi rin niya sinabi kung ilang bansa, bukod sa China, ang pinagmulan ng remittances.
“I am not at liberty to dwell on that. Siguro ’yung nasabi ko na kanina, when we made that manifestation, let us contain ourselves on that and wait until the AMLC is presented,” ani Luistro.
Wala ring inilabas na detalye kung para saan ang remittances o kung may iregularidad sa mga transaksiyon.
Nakatakdang humarap si AMLC Secretariat Executive Director Ronel Buenaventura sa Lunes, October 5, matapos ipagpaliban ang kanyang testimony para mabigyan ng dagdag na panahon ang defense na repasuhin ang financial records. /Bistado