Gumamit ng electric vehicles at solar panels.
Ito ang panawagan ng Department of Energy (DOE) sa national government agencies at local government units sa Mindanao para makatipid sa enerhiya at mapalawak ang paggamit ng renewable energy.
Inilatag ang panawagan sa 3rd Government Energy Management Program Regional Summit-Mindanao Leg noong September 29 sa Davao City, na dinaluhan ng 150 representatives mula sa state universities, government-owned and controlled corporations, LGUs at national agencies.
“Karon dunay twist because naa nay EV integration wherein we are encouraging the government agencies and facilities to invest also in electric vehicles and solar rooftops because we can serve more energy,” sabi ni DOE Mindanao Director Engr. Nilo Geroche.
Gumagamit na rin ng EVs ang DOE. Hinihikayat naman ng Department of Budget and Management ang government agencies na bigyang-prayoridad ang electric vehicles sa kanilang fleet management plans.
Pinapayuhan din ang LGUs na maglaan ng pondo para sa EVs at solar rooftops sa kanilang budgets at planning.
Target ng energy conservation initiatives na makatipid ng hindi bababa sa 10 porsiyento sa energy consumption.
Nangako na ang Davao City government na magsama ng EVs sa transport fleet nito. May ordinansa rin ang lungsod na nagbibigay ng incentives sa EV users, kabilang ang libreng parking sa unang tatlong oras sa paid parking areas.
May incentives din para sa public transport operators na gumagamit ng EVs, kabilang ang taxis, buses at TNVS.
Tinukoy naman ng DOE ang Kauswagan, Lanao del Norte bilang best-practice example matapos makapaglagay ng humigit-kumulang 3,000 solar streetlights sa national highways, municipal roads, public facilities at convention centers.
“Kauswagan is using solar PV as a practical way to connect energy efficiency with renewable energy,” sabi ni Municipal Administrator Alleson Karl Daroy.
Pero kailangan pa ng mas maraming EV charging stations sa Mindanao.
Target ng DOE na makapagtayo ng mahigit 700 charging stations pagsapit ng 2028 para masuportahan ang lumalaking paggamit ng electric vehicles.
“Kasi kailangan natin yon to support yong ating plan in expanding the use of EVs kasi mahirap naman marami ang nag pro-procure ng electric vehicle pero walang charging stations,” ani Geroche.
Nakikipag-ugnayan din ang DOE sa Land Transportation Franchising and Regulatory Board kaugnay ng EV plate registration. /Bistado