Umabot sa 87 indibidwal ang nasampolan sa Quezon City dahil sa paglabag sa curfew at iba pang ordinansa sa isinagawang “Oplan Galugad” ng Quezon City Police District (QCPD) nitong Lunes ng gabi.
Ayon sa QCPD, kabilang sa mga nahuli ang 19 menor de edad na gumagala sa kalsada lampas sa itinakdang curfew hours. Dinala ang mga ito sa barangay at ipinatawag ang kanilang mga magulang o guardian, habang nakipag-ugnayan ang mga social worker para sa kaukulang aksyon.
May ilan sa mga kabataang nahuli na hindi residente ng lungsod at mula pa sa karatig na lugar. Ipinakita nito ang patuloy na paglabag sa curfew ordinance kahit sa labas ng sariling komunidad.
Bukod sa curfew violators, may limang kalalakihan ding nasita dahil sa paglalakad nang walang suot na pang-itaas sa pampublikong lugar. May isa ring indibidwal na nahuli dahil sa pag-inom ng alak sa kalsada.
Sa hiwalay na operasyon sa Barangay Apolonio Samson at Manresa, nadagdagan pa ang bilang ng mga nahuli. Kabilang dito ang 13 pang indibidwal na walang suot na pang-itaas at pitong menor de edad na lumabag din sa curfew.
Samantala, 34 katao ang nasita dahil sa paglabag sa traffic rules sa iba’t ibang bahagi ng lungsod. Bahagi ito ng mas malawak na kampanya para sa disiplina sa kalsada at kaayusan sa publiko.
Ayon sa QCPD, ang operasyon ay bahagi ng pagpapatupad ng bagong-lunsad na Safer Cities Initiative Plan ng Department of the Interior and Local Government (DILG). Sa ilalim nito, pinaigting na pagpapatupad ng mga lokal na ordinansa, kabilang ang curfew para sa minors, pagbabawal sa pag-inom ng alak sa pampublikong lugar, at pagbabawal sa paglabas nang nakahubad sa pampublikong espasyo.
Ang mga nahuling lumabag ay binigyan ng tickets at papatawan ng kaukulang multa depende sa kanilang paglabag. Karamihan sa kanila ay pinayagang makauwi matapos ma-proseso, habang ang mga menor de edad ay pansamantalang nanatili sa kustodiya ng barangay habang hinihintay ang kanilang mga magulang o guardian.
Patuloy naman ang paalala ng pulisya sa publiko na sumunod sa mga umiiral na ordinansa para mapanatili ang kaayusan at kaligtasan sa lungsod. /Bistado