Idineklara ng House Committee on Justice sa pulong nito ngayong Miyerkules, March 18, na may sapat na batayan ang dalawang reklamong impeachment laban kay Vice President Sara Duterte, na nagbukas ng daan para sa pagsisimula ng public hearing sa March 25.
Dumiretso ang panel sa pagtalakay sa sufficiency of grounds matapos makumpleto ang mga naunang hakbang sa proseso.
Pinamunuan ni House Committee on Justice chairperson Gerville Luistro ang pagdinig kung saan idineklara na ang ikatlo at ikaapat na impeachment complaints ay “sufficient in grounds.” Ibig sabihin, may sapat na batayan ang mga reklamo para umusad sa susunod na yugto ng proseso.
Sa ilalim ng impeachment rules ng Kamara, sinusuri muna kung sapat ang porma at nilalaman ng reklamo. Kapag pumasa, saka tinatalakay kung may sapat na batayan ang mga paratang. Sa puntong ito, ang pagdedeklara ng “sufficient in grounds” ang nagbubukas ng mas malalim na pagdinig.
Mahalagang yugto ang hakbang na ito dahil hudyat ito ng pagsisimula ng public hearings kung saan ilalatag ang mga ebidensiya at testimonya laban sa bise presidente.
Nauna nang inatasan si Duterte na magsumite ng kanyang sagot sa mga reklamo matapos ideklara ng komite na ang mga ito ay sapat sa porma at substansya. Isinumite niya ang kanyang verified answer bago ang pinakahuling deliberasyon ng panel.
Sa hearing ng House Justice Committee, nilinaw ng mga mambabatas na ang pagdeklara ng “sufficient in grounds” ay hindi pa nangangahulugan na napatunayan na ang mga alegasyon. Ito ay indikasyon lamang na may sapat na basehan para dinggin ang kaso sa mas detalyadong imbestigasyon.
Sa mga susunod na pagdinig, inaasahang ilalatag ang mga ebidensiya at tatawagin ang mga testigo upang suriin kung may sapat na dahilan para iakyat ang impeachment complaint sa plenaryo ng Kamara.
Kapag inaprubahan ng Kamara, maaaring dalhin ang kaso sa Senado na magsisilbing impeachment court para sa paglilitis.
Sa ngayon, nakatutok ang mga mambabatas sa susunod na yugto ng pagdinig habang patuloy na sinusubaybayan ang pag-usad ng kaso laban sa bise presidente. /Bistado