Nagbabala ang Consunji-led DMCI Holdings Inc. na posibleng tamaan ng kakulangan sa fuel ang kanilang coal operations at suplay ng kuryente, kasabay ng pag-amin na nag-a-adjust na ang kumpanya sa gitna ng tumitinding problema sa presyo at suplay ng enerhiya.
Sinabi ng grupo na ang lumalalang tensyon sa Middle East ay nagdudulot ng panganib sa fuel supply, na direktang nakaaapekto sa energy operations nito, kabilang ang coal at power generation.
Ayon sa kumpanya, lumalala ang sitwasyon dahil may ilang fuel suppliers na umatras na sa kanilang commitments habang ang natitirang suppliers ay hindi na makapagbigay ng garantiya sa deliveries simula Abril. Dahil dito, nagiging limitado ang suplay na kinakailangan para sa operasyon.
Binigyang-diin ni DMCI chairman Isidro A. Consunji na maaaring mas lumala pa ang sitwasyon kumpara sa naranasan noong pandemya dahil direktang tinatamaan ang fuel supply na mahalaga sa transportasyon at pang-araw-araw na operasyon. Aniya, kapag nagkaroon ng disruption sa fuel deliveries, posibleng maapektuhan ang distribusyon ng pagkain at tumaas ang presyo ng mga bilihin, lalo na sa mga urban area gaya ng Metro Manila.
Ipinaliwanag naman ni Maria Cristina C. Gotianun, vice chairman ng DMCI at presidente ng Semirara Mining and Power Corp., na kasalukuyang naghahanap ang kumpanya ng alternatibong mapagkukunan ng fuel. Gayunman, sinabi niyang nabawasan na ang supply dahil sa pag-urong ng ilang suppliers.
Malaki ang epekto nito sa operasyon ng Semirara, na umaasa sa fuel para patakbuhin ang mga truck at heavy equipment sa coal mining. Kapag nagkulang ang oil supply, posibleng bumagal o tuluyang huminto ang operasyon.
Sa kasalukuyan, ang Semirara ay nagsusuplay ng humigit-kumulang 38 porsyento ng baseload power sa bansa. Ibig sabihin, anumang pagkaantala sa operasyon nito ay maaaring magresulta sa pagbawas ng suplay ng kuryente at pagtaas ng presyo nito.
Samantala, nire-review ng grupo ang kanilang mga plano at gastos dahil sa tumataas na presyo ng fuel at mga limitasyon sa suplay. Ina-adjust din ng kumpanya ang cost assumptions at rollout ng mga proyekto bilang tugon sa fuel concerns na nakaapekto sa kanilang kabuuang operasyon.
Dagdag pa ng DMCI, ang mga pagbabagong ito ay bahagi ng paghahanda sa patuloy na pagtaas ng presyo ng enerhiya at sa posibilidad ng kakulangan sa fuel na maaaring makaapekto sa logistics at operasyon ng kumpanya. /Bistado