Nanawagan sina Solid North Party-list Rep. Ching Bernos at Abra Rep. JB Bernos sa kanilang mga kapwa mambabatas na bilisan ang pagpasa sa House Bill No. 6530 o Body Cam bill.
Ang panawagan ay kasunod ng pag-apruba ng Senado noong March 16 sa Senate Bill No. 1908 sa third and final reading. Sa bersyon ng Senado, nire-require ang Philippine National Police, National Bureau of Investigation, Bureau of Jail Management and Penology, at Philippine Drug Enforcement Agency na magsuot ng body cameras sa kanilang mga operasyon.
Layunin ng HB 6530 na i-standardize ang paggamit ng body-worn cameras sa anti-illegal drug at iba pang law enforcement operations para matiyak na dokumentado at beripikado ang bawat aksyon.
Itinatakda rin ng panukala ang malinaw na protocols sa paggamit, pag-iimbak, at paglalabas ng recordings, kasama ang mga safeguard para maprotektahan ang privacy rights alinsunod sa 1987 Constitution at Data Privacy Act of 2012.
Ayon kay Bernos, mahalaga ang panukala para mapigilan ang pang-aabuso habang pinoprotektahan ang karapatan ng publiko at ng law enforcement.
“This measure is a concrete step to prevent abuses such as illegal searches, unlawful arrests, and extrajudicial killings that undermine the principles of law and justice and erode public confidence in our institutions tasked with upholding peace and order,” ani Bernos. /Bistado