Lumawak pa sa abroad ang Filipino dessert brand na Avocadoria matapos nitong buksan ang una nitong branch sa Thailand, ang ikatlo nitong branch sa international market matapos ang Singapore at United Arab Emirates.
Binuksan ang unang Thailand outlet ng Avocadoria noong March 23 sa Central Rama 9 sa Bangkok. May plano ring magdagdag pa ng mga branch sa loob ng taon, ayon sa kumpanya.
Sinuportahan ng Philippine Trade and Investment Center (PTIC) Bangkok ang pagpasok ng brand sa Thai market. “This initiative aligns with the Department of Trade and Industry’s thrust to promote the global competitiveness of Philippine MSMEs and strengthen the presence of Filipino brands in international markets,” anang PTIC.
Itinatag ni Czarina Jagto-Sevilla ang Avocadoria, na nagsimula bilang maliit na negosyo sa Pasig City at lumaki sa mahigit 260 branches sa loob ng pitong taon. Malaking bahagi ng pag-angat ng brand ang flagship nitong avocado ice cream cheesecake, na nakaugat sa matagal nang pagkahilig ng founder sa avocado. /Bistado